به گزارش ایراف، هیأت بلندپایه تاجیکستان که به کابل سفر کرده است با امیرخان متقی، سرپرست وزارت خارجه طالبان دیدار کرد.
این اولین سفر یک هیأت تاجیکی به افغانستان تحت کنترل طالبان، پس از چهار سال قطع روابط دیپلماتیک است.
این هیئت ۱۴ نفره متشکل از مقامات امنیتی، استخباراتی و دیپلماتیک ارشد تاجیکستان است، هدف از این سفر، گفت‌وگو برای تقویت همکاری‌های سیاسی و امنیتی اعلام شده است و انتظار می‌رود با دیدارهای دیگری با محمد حسن اخند، رئیس‌وزیران طالبان و عبدالحق وثیق، رئیس استخبارات طالبان ادامه یابد.
این در حالی است که پیش از این یوسف وفا، والی طالبان در بلخ و یکی از افراد نزدیک به رهبر آنان، به تاجیکستان رفت و با برخی مقام‌های این کشور دیدار کرد. وزیر دفاع تاجیکستان نیز به تازگی در سفری به پاکستان در باره وضعیت افغانستان با مقام‌های پاکستانی گفتگو کرد.
همچنین این سفر درحالی صورت گرفته که تنش میان طالبان و پاکستان و نگرانی از گسترش آن بالا گرفته است.
تاجیکستان که پیش از این از منتقدان طالبان بود و از مخالفان این گروه میزبانی می‌کرد، اینک گام بلندی در جهت تعامل با طالبان برداشته است.
