به گزارش ایراف، این نگرانی در حالی مطرح می‌شود که حدود ۳۰۰۰ مهاجران افغانستان در تاجیکستان تحت حمایت مالی کانادا منتظر بررسی پرونده‌های پناهندگی خود هستند و با دستور اخراج از سوی دولت تاجیکستان روبرو شده‌اند.
به گزارش سی بی سی، یکی از این مهاجران، بی‌بی خاتون یعقوبی، ۵۷ ساله، است که به تاجیکستان پناه برده و اکنون در خطر بازگرداندن اجباری به کابل قرار دارد.
نورالله حاکمی، فرزند وی که شهروندی کانادا را دارد، از دولت فدرال کانادا خواسته است روند حمایت مالی و مهاجرت مادرش را تسریع کند تا جان او در امان بماند.
بی‌بی خاتون پیش از تسلط طالبان به عنوان مشاور در دولت افغانستان کار می‌کرد و در جریان تجلیل از سالگرد قدرت‌گیری طالبان در آگوست ۲۰۲۴، به اتهام توهین به طالبان در خیابان‌های کابل ضرب و شتم قرار گرفت که منجر به شکستگی دست و پاهایش شد.
پسر او به شبکه خبری سی‌بی‌سی گفته است که او پس از بهبودی اولیه راهی تاجیکستان شده است.
رفیع فردوس، یکی از اعضای شورای افغانستان-کانادا، با اشاره به وضعیت این مهاجران افغانستان ، خواستار اولویت دادن به پرونده‌های شهروندان افغانستان در تاجیکستان شده است.
هلن تیبو، دانشیار علوم سیاسی در دانشگاه نظربایف در آستانه، قزاقستان نیز می‌گوید که ممکن است تصمیم تاجیکستان برای بازگرداندن پناهندگان افغان، تحت تأثیر فشارهای سیاسی و اقتصادی منطقه‌ای و الگوبرداری از سیاست‌های کشورهای دیگر باشد.
تیبو گفت تاجیکستان ممکن است از روسیه که طالبان را به عنوان حاکمان مشروع افغانستان به رسمیت شناخته است، پیروی کند.
او گفته است: «هر زمان که روسیه کاری انجام می‌دهد، تاجیکستان یکی از اولین کشورهای آسیای مرکزی است که از آن پیروی می‌کند.»
