به گزارش ایراف، معاون اقتصادی نخست وزیر طالبان بیان کرده است که تلاش‌ها برای افزایش صادرات افغانستان مثمر بوده و نسبت به دو سال گذشته سطح صادرات افغانستان دو برابر افزایش یافته است.
معاونت اقتصادی طالبان در یک ویدیو که به تازگی منتشر شده گفته که افغانستان از ۲۴ بخش به بیش از ۸۰ کشور جهان صادرات دارد و بیشتر این صادرات از ۱۳ ولایت کشور انجام می‌شود.
به گفته وی، برای توسعه و معیارسازی صادرات کشور در ولایت‌های هرات، بلخ، ننگرهار و پکتیا بسته‌بندی اموال صادراتی انجام می‌شود که برای یک صدهزار نفر زمینه کار را نیز فراهم خواهد کرد.
از موارد صادراتی این روزهای افغانستان می‌توان به صادرات نخستین محموله مواد خوراکی حیوانی افغانستان به تاجیکستان اشاره کرد.
مسئولان در وزارت صنعت و تجارت بلخ گفته‌اند که نخستین محموله مواد خوراکی حیوانی تولید افغانستان به تاجیکستان صادر شده است. این محموله ۲۵ تُن وزن دارد که پس از روند بررسی تضمین کیفیت از سوی تاجیکستان، به آن کشور صادر شده است.
به گفته مسئولان صنعت و تجارت بلخ، قرار است امسال بیش از هزار تن مواد خوراکی حیوانی از بلخ به تاجیکستان صادر شود.
البته روابط افغانستان و تاجیکستان مدتی است که وارد فاز جدیدی شده است. پیش از این ادعاهایی درباره اعمال «محدودیت» بر فعالیت «جبهه مقاومت ملی» از سوی دولت تاجیکستان و تمایل دوشنبه به ترمیم روابط خود با دولت طالبان منتشر می‌شد.
حتی منابع همسو با طالبان ادعا می‌کنند که فعالیت «جبهه مقاومت» در تاجیکستان «محدود» شده و به همین دلیل، احمد مسعود مجبور شده، خاک این کشور را به مقصد انگلیس، ترک کند.
این در حالی است که از زمان سقوط نظام جمهوری و به قدرت رسیدن دوباره طالبان، تاجیکستان تنها کشور همسایه افغانستان بوده که از برقراری روابط سیاسی با طالبان خودداری کرده و به رهبران جبهات نظامی مخالف طالبان، پناه داده است.
با این حال، گفته می‌شود که تاجیکستان، سال گذشته کنسولگری افغانستان در شهر خاروغ این کشور را به طالبان واگذار کرد.
بسته شدن دفتر جبهه مقاومت افغانستان در تاجیکستان موضوعی است که توجه بسیاری را به خود جلب کرده است. در هر حال تاجیکستان ممکن است در تلاش باشد روابط خود را با دولت طالبان بهبود بخشد و به همین دلیل دفتر جبهه مقاومت که مخالف طالبان است را بسته باشد.
درباره ی احمد مسعود از سه ماه پیش تاجیکستان را ترک کرده است بخوانید.
